Emburriando palabres

Les cámares d´Informe Semanal tan tresnando pel conceyu estos díes pa grabar l´estáu de les obres de la Variante que nos xunirá a la meseta. La información ta de norabona. La verdá ya non tanto, y ye que la verdá pue arruinar una buena noticia. A les hores del cambiu de turnu operarios que trabayen na Variante y parroquianos entemecense nos chigres, y les sos conversaciones entemecense tamien. Un vezu paezme que persaludable que ta perdiéndose y que sobrevive tovia nos pueblos.

-¿Te han grabado los de Informe Semanal?-Diz un currante con goyeres.

-Están por aquí?, no lo sabía...-Contesta otru, que pol acentu pue ser estremeñu.

-Que baxen per equí y me caten pa preguntame, verás lo que-yos digo...- esti yá ye del llugar.

-Uuuh, día queda-yos un documental bien guapu, si. - aporta´l vecín.

El chigreru trata de sumar datos a la conversación quexándose porque tan acabantes de roba-y a un colega chigreru y ya son munchos los robos peles tabiernes de la contorna, y tal paez que la guardia yá nun furrula tan eficazmente como aquella temporada qu´empaquetaben a los vecinos del pueblu más arriba cuando estos entamaben a tar fartucos de les primeres voladures illegales y escomencipiaron a facer denuncies...

-Y empapelábenlos pa mete-yos miéu- diz enchipáu.

Yo ente tanto atiendo pa la conversación como´l nenu qu´atiende pa lo que cunta´l güelu, ensin saber si lo que diz ye verdá o mentira, pero qu´a la fin fascina. Los operarios apuren los últimos sorbiatos enantes de dir al tayu. Sorbiatos que-yos saben a gloria teniendo en cuenta qu´hasta dientro de unes 13 hores nun serán llibres otra vez.

Mientres, quien güei echa daqué minutu de más ye ún de los encargaos, qu´echará a cuenta d´ello tamién cerca les 14 hores trabayando, cosa que tieniendo en cuenta que trabayen 10 díes seguíos a cerca de13 hores diaries nun podemos dicir que nun la biquen precisamente. Entra pa coincidir colos trabayadores pa dici-yos que nun faigan llocures, que nun fumen, que lleven cascu y guantes llimpios del trinque,...porque les cámares de televisión captarán los sos movimientos. Son órdenes de arriba. Too ha de tar perfecto pa qu´esos telespectadores que tean h.odíos pola crisis vean a lo menos que tan faciéndose coses útiles pa toos como l´AVE. Y pa que los telespectadores que tengan tovía la suerte de trabayar (como un burru por 1000 euros que nun alcancen pa na, pero trabayando a fin de cuentes) crean que sí hai xente que paez que trabaya en bones condiciones. Pa que crea que´l so casu ye un "caso aislado" dientro d´un territoriu en progresu en manes d´un Gobiernu eficaz dignu d´un país del G-20. Y campiones de la Eurocopa, poco más podemos pidir.

Los pexes gordos con llicenciatura (pero non de los llicenciaos que trabayen en una cosa que nun ye la d´ellos porque nun-yos queda más remediu, o de los sí "trabayen" de los suyo pero tienen que facelo llambiendo culos a razón de 10 hores diaries por un sueldu de becariu) ríinse ente tanto cola xente del equipu del programa cola tranquilidá y grandonismu del que sabe que tien el pechu a piques d´enllenase de medayes.

-¿Por qué nun vinieron a grabar va tiempu cuando tabemos faciendo´l túnel pa que la xnete viera como se trabayaba equí?

-Que me saquen a mi y m´entruguen, que me saquen...

Y la verdá nun creo que se cortaran nin un pelu ente les cámares teniendo en cuenta que munchos d´ellos saben que tan a un pasu de dir pal paru depues d´una temporada tratándolos como perros con cabarres y que cualquier día d´estos despacharánlos avisando d´un día pa otru. Nin 15 díes nin osties. Cola resignación de quien nun va ver una medaya na vida.

Les sos palabres nun saldrán pela tele, nin les de los vecinos afectaos, nin probablemente nengún túnel llevará´l nome de los trabayadores fallecíos. Esi honor solo ta reservao pa los muertos n´accidente llaboral que lleven montera (non picona) o tricorniu. Supongo, anque espero enquivocame, que nun fadrán mención especial a los trabayadores que son los que realmente tan sacando la obra alantre, aquellos que pa encima de tar puteaos nun se quexen y son los que realmente son capaces de solucionar problemes ensin medios,...aquellos qu´han de llimpiar el sangre d´un compañeru accidentau pa dexar l´"escenariu del crime" de tal manera que paeciera qu´elli nunca nun pasó nada.

La noticia ha de ser digna d´una televisión moderna d´un Estáu modernu.     Modernu, pero pel qu´arroya la ineptitú mires per onde mires. Por muncho que la tele fale de les maraviyes de l´alta velocidá l´Estáu amuesa de que lláu ta. El so error estratéxicu ye de bultu, vése de lloñe (y merez que se fale d´ello más tranquilamente). Y ye que tando somorguiaos como tamos nesta fonda crisis y (esto ya ye opinión personal anque ya digo que merez tratu aparte) teniendo en cuenta qu´esta obra, y otres tantes de construcción civil, tien tola pinta de nun tener más envís que sacar xente del paru, debería l´Estáu facer por meter más xente, más turnos. Si nun lo fai polos derechos llaborales que se chafen de contanes polo menos facelo pa que les cifres de paraos nun medren tan escandalosamente. tampoco vamos pidir imposibles, la xente paez que ta contento col tema esti del AVE mientres les grandes constructores tan faciendose descomandamente riques colo que toos felices. Ta entamandose una burbuya a alta velocidá cola que tamos realmente cegaos. ye progresu, puntu redondu.

Decía un paisanu queye bien afortunáu aquel que siendo llistu pase por tontu porque nunca llevantará sospeches y tendrá a tolos vecinos engañaos. En viendo´l reportaxe que faiga la xente d´Informe Semanal pue ser que tenga que tragame munches de les palabres que con plena concencia toi escribiendo equí, pero desgraciadamente veo poques posibilidaes d´ello porque yo pienso como esi paisanu y la caxa tonta a la fin pue ser que nun sea tan tonta como la pinten.

Ye difícil amosar anguañu refugu pa cola gran obra de la Variante de Payares, difícil anque teas en plenu contactu con ella y t´estrelles de cabeza de cotanes cola rialidá qu´alrodia tala bestia de la inxeniería civil y conozas la otra cara de la bestia muncho meyor que munchos tertulianos, politicos, sindicalistes... Y ye difícil desplicar esi sentimientu de refugu non por falta d´argumentos (ún metese na cama tolos díes con ún o dos argumentos más), ye difícil porque les veces que la plátiga chigrera cala nesti asuntu los argumentos colos que topes na mayor de les veces empiecen por un rotundu "Progresu", pasando por gran "Beneficios" y finando con ún "quies vivir na caverna". Eso pasa nos chigres (esti fenomenu mengua nos chigres de L.lena y practicamente desapaez nos del Valle´l Güerna), nos medios de comunicación, nes cases conceyu, nes Xuntes Xenerales de los Principaos, nes columnes d´opinión...Naide, absolutamente naide de los que tan en disposición de pegar un golpe dientro les instituciones nin siquier plantea qué consecuencies en términos económicos, llaborales, sociales y ecolóxicos pue tener una obra d´esti calibre. Nun lo planteen y van cómodos siguiendo la fácil corriente de los que tan en pro del "Progresu".

progresu, el: sust. Aición y efeutu de progresar o avanzar.

progresar: v. Adelantar, avanzar [nes ciencies, na cultura, na economía, na civilización]. 2 Movese [daqué gradualmente, per etapes socesives].

Faciendo comparanza ente´l significáu de la palabra progresu y la rialidá que se me presenta delantre los güeyos ca vez qu´entro na boca de la bestia llego a la conclusión que, en verdá, lo que digan los diccionarios o los filólogos poco importa. Y ye que los qu´usen davezu estos términos pa xustificar que la bestia espollete o nun son conscientes del verdaderu significáu de la palabra progresu o simplemente nun saben que lo qu´en verdá ta ocurriendo de Campumanes p´arriba ye una simple, cruda y palpable involución. Nun refugo un meyor acondicionamientu y comunicación d´Asturies al esterior, de manera razonable, viable y sostenible si hai garantíes reales de qu´aportarán beneficios significativos a la sociedá asturiana, del primer al últimu ciudadanu. Eso pa mi ye progresu. Pero eso nun ye lo que pasa de Campumanes p´arriba. Ye bien distinto. Pa ellos L.lena ye´l ñeru onde medrará el progresu asturianu. Esi progresu del que tanto falen ye vulnerar y frayar los derechos llaborales de los trabayadores con xornaes d´hasta 14 hores diaries, desamparaos por unos sindicatos que callen como afogaos; ye´l blanqueu de perres por parte d´empreses de dudosa llegalidá gracies a fondos públicos ente´l silenciu de medios de comunicación, UTEs, sindicatos y políticos; ye´l tapecimientu y trampiáu d´escenarios d´accidentes mortales pa dexar desamparaes a les families afectaes y poder siguir ensin torgues xudiciales esta obra en pro del progresu; ye contaminar y estrozar un valle ensin da-y desplicaciones a los afectaos, nin asoleyar datos periódicos sobre l´estáu de los caminos, tierres y agua de la xente que vive directamente d´esos factores; ye´l traficu descaráu de carne, del despíu improcedente pero amparáu; progesar ye facer les coses a les espaldes de la xente, ensin dar la cara nin preguntar, y cuando pregunta nun ven rempuesta; progresu ye invertir una cantidá desorbitada de perres nun país en plena decadencia, ensin productos qu´esportar (lo d´El Musel ta por ver) y con grandes carencies n´educación, vertebración interior, investigación y desarrollu, creación d´empleu alternativu, sanidá, infraestructures menores a nivel de conceyu, texíu industrial...y con una montonera de paraos a piques de que se-yos escose´l derechu a paru anates d´atopar otru trabayu, una inversión tan descomanada qu´en verdá, a estes altures, nun se sabe de xuru si podrá pasar un llamáu Tren d´Alta Velocidá y en que condiciones, ni onde calará nin per onde´dirá nin cuando calará, y lo que ye más grave, si aportará´l día que fine. Progresu ye facer too eso con fondos públicos, una versión insultante que dexa la dubia a munchos si beneficiará a la totalidá de los contribuyentes, si´l so nivel de vida-yos permitirá facer usu d´ello o si será una inversión de munchos del que solo llegarán a beneficiase unos pocos. De momentu ta claro, los beneficiaos de momentu son les grandes constructores que tienen nes manes les alxudicaciones de les obres. Los perxudicaos son los trabayadores que tan sacando la cosa alantre y los y les vecines del conceyu sobremanera.

Aquellos que rialemente custionen seriamente la viabilidá d´esta obra, nun topen más que la inorancia de los poderosos, de los que marquen el significáu de les palabres. esta vez toca-y a la palabra democracia. Aquellos que lleven tantos años dando lleciones de democracia nun faen más qu´amosar que desconocen la etimoloxía de tala palabra. Y ye que la falta de tresparencia cola que se ta llevando alantre esta asquerosa xera de traer el progresu al nuesu país ye manifiesta. Nun dubien un minutu al envelenar a los vecinos, estrozar les tierres granibles, cortar les sos caleyes o facer voldaures illegales. Les voces afectaes y quexones en forma d´asociaciones vecinales y ecoloxistes nun solo nun son escuchaes como seria menester nun estáu DEMOCRÁTICU si non que son silenciaes, despreciaes y cuando non vilmente criminalizaes. Asociaciones vecinales que nun faen otro que facer llegar les quexes de la xente afectao han de recurrir a organismos ayenos a les aliministraciones españoles, Defensor del pueblo,...porque estos que tan por aidar a los ciudadanos que-yos paguen nun faen otro que facese los "Suecos" (anque permitanme qu´invente una nueva espresión yo tamién, facese los "Españoles"). Y desgraciadamente, anque nun lo espeyen los medios de comunicación nin les corrientes d´opinión oficiales, nos chigres del Valle oyense mas voces contraries a la bestia que les que participen activamente dende plataformes concienciaes col asuntu. Pero quicias nun "salgan del armariu" por mieu a metese en "güertos" o simplemente por mieu a l´afición que tien esti "Estáu Democraticu" de señalar col déu a los que simplemente tienen una percepción distinta de les coses y que podríen apurrir opiniones beneficioses pal correctu, xustu ya igualitariu espoxigue de la sociedá. L´afición de´Estáu de señalar col déu y de tratar como delincuentes comunes que nun tienen más arma que la palabra, vease cuando´l Delegáu de Gobiernu ordena a los "defensores del ciudadanu"  acorralar y echar fuera de Campumanes a los discordantes activos ente la visita del Cesar, del socialista zapatero. Pa qu´el Cesar nun esfronara cola rialidá d´un pueblu sometíu dafechu. Previamente llimpiose too, pintose too, repartiose ropa llimipio y nuevo pa que los padres de la bestia crean que la bestia nun lo ye tanto, y pa que la semeya saliera perfecta, pa que s´amosara, non una verdá a medies, si non una gran Mentira pa que la xente crea dende los sos sillones que l´AVE non solo ye necesario si non qu´amás se fai ensin irregularidaes.

AVE Cesar, los que van morrer (vas matar) saludamoste

Garremos un periódicu del martes dia 9 de Xunu. Ún d´ellos informa (alerta) sobre l´ataque a la cabezalera de l´asociación pro-"billingüismu" gallegu "Galicia Bilingüe" esa selmana. Pintaes y cristales frayaos nel so coche, pintaes na puerte casa ( una diana col so nome, con "vivas" a "Resistencia Galega", grupu minoritariu que reivindica delles colocaciones d´esplosivos nos ultimos años, una ETA galega, ¿pa que quies más?).

 Bien, lleguennos a la cabeza les imaxes de mozos encapuchaos que traviesen y balten contenedores y llancen piedres y botelles peles cais de Santiago nuna manifestación caliente entamada y sofitada por Galicia Bilingüe, UPyD, PP...La Batasunización de Galicia!. Lleguennos tamién imaxes del recibimientu a una universidá de la mesma ciudá de mozos independentistes a San Gil. Situación caliente. Batasunización de Galicia!. Estos fechos repitense hasta la fartura en mass media, y siempre acompañaos de terminos apocalípticos que dan una imaxe de Galicia alarmante. Comentarios en foros, en Radios, periódicos,..."Hay que parar esto", "Se nos va de las manos"...otros, como nun foru de la Policia Nacional la llocura llega a puntos insospechaos "Hay que darles duro", "Con tolete aprenderán", "En galicia están aprendiendo mucho de sus hermanos mayores de la Kale Borroka"... Entámase,  un discursu alredeor d´estes engarradielles alarmante (alarmizante), vinculandolos a otros fechos asocedíos notros llugares de la nuesa gran España (puntuales, pero estratéxicamente puestos delantre la población pa dar la sensación de qu´eso ye lo más normal nesos llugares). Crease una empatía xeneralizada na sociedá española pa cola xente de Galicia Bilingüe, UPyD,...esta xente que tien de sufrir de cotanes la furia de los descontrolaos "galegos batasunizaos" (pero tamién de catalanes, asturianos...batasunizaos, los intentos de vincular los fechos son repetíos, y equí, n´Asturies sabemos de que va la cosa, creose´l terminu "aturtxale" pa resumir). La sociedá afirma rotundamente que´n Galicia quieren imponer el gallegu, pero nunca pisó Galicia, nin faló con un gallegu. 

Cara B (Precedentes)

Actos de Galicia Bilingüe interrumpíos pacificamente por mozos y moces prollingua desagospiaos en dellos casos violentísimamente por seguidores "superdemocraticos y sosegaos" de G.B ( http://www.youtube.com/watch?v=ilfbvxbmTOM&feature=related , durante´l vidiu vense yá les formes de los simpatizantes de G.B., al sacar a mozos pacificos a la brava, sicasí, nel MINUTU 5:30, saquen a puñetazos a dos mozos que nun tienen pinta de querer engarrase, de fechu nin gurguten) ¿Argumentos daos por G.B. a los "violentos" que refuguen l´actu?, igual a cero, nengún. Equi G.B tuvo una oportunidá d´oru pa "desarmar" y desllixitimar a aquellos que creen que tres l´usu del términu "Bilingüismo" s´escuende una cara oculta delantre un teatru estrao. Pudieron invitalos a sentase y platigar, y si tan seguros taben, dexalos vendíos, los activistes "Prollingua" abocanaríen por falta d´argumentos. Nun lo ficieron, nun yos pagaba la pena argumentar. Manifestación a favor del Billingüismu en Santiago. Dellos manifestantes de "la pacifica, democratica y necesaria" G.B. cola collaboración de la policia insulta y apalea con paragües y toletes a "descontrolaos" qu´amuesen el so refugu a la supuesta realidá cotidiana que planteen na mafiestación convocada. Munchos d´estos "incontrolaos" ficieronlo de la manera más violenta posible: Amosando un papel con un mensaxe escritu, notros casos, faciendo usu de la famosa retranca gallega de manera tan pacífica como intelixente.( http://www.youtube.com/watch?v=nmXqNd4w6VE y http://www.youtube.com/watch?v=IBwosdOYD-I ). Otros, agora yá dexando de lláu la ironía, perdieron los nervios y protestaron como peor teníen que facer, desgraciadamente cola violencia. Podíemos seguir repasando y repasando. Correos de respuesta per parte de la ya nomada asociación a xente que quier denunciar tratu discriminatoriu en estamentos publicos por querer falar en gallegu, de xente que pide que retiren una semeya na so web onde apaecen manifestandose pacificamente´l Dia das letras galegas y onde se fai burla d ellos... respuestes, qu´en tolos casos ye desafiante, onde se fai chancia, provocadores,...y hasta onde se reconoz que sí se dan casos de discriminación a los galegofalantes....¿Onde quiero llegar?O meyor dicho, ¿onde quieren llegar?¿quién entama esta engardidiella?¿Quién participa?

Nun ye custión de facer un repasu a lo asocedío en Pearl Harbor tirar de teoríes de la conspiración (pa eso ya ta Zeitgreist http://video.google.com/videoplay?docid=8883910961351786332 ) pero encaxa. Veamos:

• 1º Un garapiellu perimportante de la mocedá gallega vertrébase como nunca fizo. Movilízase, muévese, crea, construi, entruga, respuende, retruca. Créase una concencia. Los herederos de los acomplexaos garren concencia de que nun son "paletos", faen música, cine, lliteratura, estudios científicos...na llingua qu´Emilio Celso Ferreiro llamó "proletaria" ensin vergoña. La verdá oficial cimbla, ye custionada, daqué ta cambiando na Galicia oficial y esteriotipada de Franco, Fraga, de los caciques...de paisanos con boína y "verdes pastos". La más entrañable y domesticada "nacionalidad histórica" camuda. Hai gallegos qu´entamen a llamar públicamente ensin prexuicios nin mieos a la so tierra "País". El gallegu, idioma de les clases populares pa munchos yá nun ye un idioma pa falar coles vaques, ye un idioma pa xestar movimientos ecoloxistes, teatrales, musicales, vecinales, xuveniles, estudiantiles...Pa sacar de casa y espresar que nun tienen vergoña de nada.

• 2ºLa mocedá vota. Voten y echen a caciques y apoltronaos. Eso preocupa

• 3ºPreséntase ente la sociedá un conflictu del que nunca sintió falar.  Necesiten llexitimase y convencer y la meyor manera de llexitimase ye sofrir agresiones y magnificales. ¿Como faen eso?¿Como van llexitimar la defensa d´un conflictu que nun esistió?Sábese qu´el gallegu ta tovia somorguiáu pol castellanu, que la reciella gallega sal de les escueles sabiendo castellanu pero non toos saben gallegu, y munchos que lo saben nun lo usen...¿quién va atacar esti planteamientu-falacia?

• 4ºProvocando, instigando y machacando a los sectores más sensibles y calientes de la mocedá activo de manera sutil, intelixentemente, tapecidamente, a lo zorro, discretamente, la etiqueta "Bilingüe" y la repetición de palabres como "Igualdá", "Democracia"...tapecen les puerques intenciones d´aquellos que simplemente nin pescancien, nin acepten, nin quieren, que se planteen ciertos debates.

• 5ºPrimeres acciones-agresiones en manifestaciones, visites, conferencies, charres...por grupos minoritarios. 
• 6ºMagnificación de la situación, qu´alimenta a la fiera qu´entra al trapu. Publicidá y espardimientu nos medios de comunicación que combayen col movimientu "ProBilingüe" de la situación que carecen.  
• 7ºMás agresiones, y agora feches a la lluz del día, nuna manifestación. Entren en xuegu les Unidades de Intervención Policial. Unos títeres más, ferramientes al serviciu de los intereses de los poderosos. Pamidea son tamién victimes d´esti xuegu, ponenlos en primer llinia, esponenlos al peligru abiertamente, faen el trabayu puerco d´otros,...y faenlo ensin quexase, de buena gana, movíos "por servir a los ideales y bienestar de la Patria y sus ciudadanos" desconociendo les verdaderes intenciones de too. Quexaranse del sueldu, o que l´Estáu nun-yos lo agradez, o de que la xente de la cai a veces nun-yos tien respetu, pero nunca de que´l Poder ta usándolos como muñequinos pa los sos intereses. Y faenlo ensin recibir más "reconocimientu" que la d´una sociedá qu´asume que si actuen ye por daqué, que los violentos actuaron enantes. Nun paga pena ver les otres imaxes de la manifestación per internet ( http://www.youtube.com/watch?v=IBwosdOYD-I ), la Policia Nacional ta p´actuar, nun se custiona lo que fai ...
• 8ºVictivismu y empatía social ("¡Si lo que buscan es el Bilingüismo!"), parte de la sociedá española asume por fin un conflcitu onde unos pocos quieren imponer a otros. Mientres, na llonxana Gallaecia la vida sigue, con episodios esporádicos, puntuales y desafortunaos (y condenables)de xente qu´entra nel xuegu de Galicia Bilingüe...Parte del nacionalismu gallegu más ranciu y radical y del nacionalismu español más ranciu y radical enfrentense delles vegaes. Los dos rancios, radicales. El pueblu gallegu en metanes. Y los dos movimientos, segun paez, necesítense pa poder argumentar les sos postures: "Mozos gallegos , inconscientes, radicales y paencima independentistes actúen escontra la fuerza impositiva ultraespañolista ya imperialista". La verdá oficial informativa nun rescampla nada de la parte integrista, fundamentalista, españolista, nacionalista, violenta, vieya guardia, nostálxica,...de dellos simpatizantes de Galicia Bilingüe.
• 9º"Esta situación la provoca el bipartito", onde apaez nuna sigla la palabra "nacionalista". Esto marcha. Los "no-nacionalistas" que se faen llamar billingües atacaos polos nacionalistes.
• 10ºMiéu, más miéu, más miéu. Y el miéu gana munches veces elecciones. Resultaos:
• 11ºCambios nel gobiernu y nel panorama gallegu y un nuevu partíu qu´apaez con relevancia nel escenariu Estatal, votos d´UPyD, el partíu que va glayando el problema "rial y cotidianu" de ser castellanoparlante na Galicia galegofalante recibe l´apoyu de 1,85% de los principales implicaos, l´electoráu gallegu, y ye qu´en verdá, hai muncha xente gallego que nun termina de tragar la hestoria que vien cuntando Rosa Díez ( http://www.youtube.com/watch?v=22xz0fc2jc8 ). Lloñe, onde la xente nun conoz la rialidá gallega, nin-yos va nin-yos vien el supuestu conflictu, onde nun custionen lo que dicen los mass media,en Madrid el 6,45% (n´Asturies el 4,22%). El PP recueye frutos.

• 12ºLos reciénllegaos al gobiernu, defensores del ideal billingüe gallegu y la llibertá, echen fuera l´ente PÚBLICU gallegu, la TVG, aquel ente públicu que tien nos estamentos mirar pola difusión de la cultura y llengua gallega, a Xurxo Souto, un auténticu axitador de conciencies, revolucionariu de les ondes que dignificó, espardió, difundió, potenció y presentó a la gallegada con ésitu too un movimientu frescu, n´ebollución, de calidá, innovador, de música fecha polos herederos de los acomplexaos, fecha llibremente, na llingua gallega. La manifestación cultural más pacífica d´una mocedá gallega que esconsoña. el sustitutu de Xurxo Souto, nun exercicu de billingüismu ensin igual, entama lo que yera l´unicu programa na Radio del País vecín dedicáu a la música fecha na so llingua propia, con un cantar de Bruce Springteen. Los "ProBillingües" dexen fuera la conocencia del idioma llariegu pa puestos públicos que salgan en Galicia. Y tamién faen cambios nel sistema educativu planteau pol anterior gobiernu "Bipartito". Esi, planteamientu tan "conflictivu" y qu´"atacaba´l pensamientu billingüe" y que nun yera otro que garantizar la presencia del gallegu nel 50% de les hores lectives de los escolinos, sisi, EL 50%, abriendo tamien la posibilidá de poder estudiar en castellanu o en gallegu esclusivamente en dellos centros. La TVG del democráticu Feijóo censura´l 2 de Xunu un documental fechu durante l´anterior llexislatura sobre "Les vaques lloques" que dexa col culo al aire a l´anterior alministración gallega del PP,...y esto ye namás el principiu...( http://www.youtube.com/watch?v=dKSSe-NRN9E&feature=channel_page )A los demás quédanos reflesionar. Sacar conclusiones y asumir que la meyor rempuesta faise de manera pacífica ya intelixente. Eso ponlos nerviosos, nun ye lo qu´esperen. Tan sollertes, la minima oportunidá van usala (veamos el tratamientu del casu Fer). Un minutu onde se pierdan los nervios, de calentura, puen esfarapar años de llucha y trabayu. Y ye lo que busquen. Amosa-yos ser mas intelixentes qu´ellos trabayando y defendiendo unes idees dende l´argumentu y de manera pacífica ye acorralalos.

Ye lo que-y queda a la mocedá gallega.

"Somos herederos d´una dictadura cultural

somos les victimes d´un ataque brutal escontra lo nueso!

La llingua mantuvímosla callando al cacique

Falando al pie la llume la llingua váse a pique

Pos toma! escúchanos!, nun callaremos nin de broma"

Siguiendo colos post d´atrás onde faigo propuestes p´argumentar a toos aquellos contrarios la necesidá d´oficializar y dignificar l´idioma, animando a usalos cuando vos veais involucraos directamente nel eternu debate que carecemos los asturianufalantes. Enantes toco-yos a les razones polítiques y económiques. Güei, razones educatives. 

3ºEducación. ¿Y nuestros hijos van aprender bable?Estamos en el siglo XXI, tendrian que aprender frances, ingles y alemán.

Bien, ¿quien dixo que ye incompatible?De fechu ye deseable. Desgraciadamente, yo, que en tola mio vida como estudiante dedicaríen unos venti minutos pal asturianu sali de la escuela falando mal inglés. Cabe esperar que si ye incompatible l´asturianu col deprendimientu d´otres llingües los nenos del postfranquismu que nun dimos una palabra de bable na escuela sabríemos agora milenta llingües. Pero en verdá el francés nin lo golí, del alemán, nun te digo...

Pero inda más, n´Asturies dase una atrocidá llingüistica, (que munches vegaes creo que ye la que ta salvando l´idioma) que se llama diglosia. De cotanes oyense casos d´amigos que trabayen pa Madrí y danse cuenta, dempués de ventipicu años falando, qu´usaben espresiones que nun son castellanes, fizo-yos falta salir pa dase cuenta que nun saben falar castellanu correctamente. Munchos nenos d´equi nun distinguen el castellanu y l´asturianu en momentos puntuales, o lo que ye lo mesmo, nun saben falar nin castellanu nin asturianu a la perfeccion. Y sí, veo pernecesaria una presencia más importante de francés, ingles,...nel sistema educativu astur, pero, anque la enseñanza sea billingüe Castellano-English (daque positivo) el billingüismu morrería fuera de la escuela. Sabríen falar dos llingües perfectamente, sí, pero de puertes pa fuera la realidá ye otra. Nun planu de desendolcu intelectual, un nenu que viva nun contestu billingüe les 24 hores del dia ponlos en ventaya sobre otros que vivan nun contestu monollingüe. Periódicos, música, emisores de radio, cartelos, televisión, vecinos...qu´usen indistintamente dos llingües van crear una axilidá nel nenu pa cambiar de rexistru instantaniamente que nun tendrán otros, nin los de la escuela Castellano-English. Esti fechu que sería envidiao por munchos, equi refugamoslo, pue ser por ignorancia. Amás, vayase al post anterior, consumiríen y potenciaríen una industria llocal con total normalidá.

Otru argumentu. ¿Con que valores educaremos a los nenos asturianos si nun-yos deprendemos a apreciar, conocer, y valorar la so realidá más inmediata?¿Como van dir pela Europa del mestizaxe si odien la llingua de los sos güelos?¿si refuga la realidá asturiana de la que forma parte que nun fadrá cola cultura d´un foriatu?¿como sabrá apreciar otres manifestaciones culturales si nun aprecia la de so?Nun poder dase cuenta de la guapura de la diversidá cultural del planeta sí que me paez un atrasu...

Y p´acabar, esti "argumentu" que dan los contrarios a la oficialidá de la llingua rescampla otra vez que detras de too ta un interes politicu. ¿Onde taben toos aquellos que refuguen (o incluso odien) porque segun ellos "nun val pa na" un intentu de tresmisión digna del idioma nel sistema educativu cuando munchos de nos deprendimos llatín nel institutu?¿Nun se trataba d´una llingua cola que la comunicación colos demas diba ser más complicao?De fechu ta muerta. ¿Por que nun salieron diciendo que neses hores nes que se daba llatín se diera frances por exemplu?Pos porque nun ye una custión de politica. Yá d´aquella munchos de los que d´aquella conxugábemos el "rosa-rosae" tabemos pensando que cuantu meyor tabemos deprendiendo palabres n´asturianu. Agora damonos cuenta que toles llingües, el llatín tamien, son guapes, y guapo ye sabeles

Una de les ultimes entraes de fueyaenblancu (http://fueyaenblancu.nireblog.com/post/2009/06/16/ciudadanos-critico-la-politica-linguistica-del-pp-en-asturias) vienme que nin pintada. Y ye que Cuidadanos, ente l´ultimu espisodiu de la nuesa alloriante politica llingüistica diz (ente otres coses) lo que vien darreu:

"Así mismo, no creemos que sea el momento más propicio para generar nuevos gastos inútiles e innecesarios a una Administración Pública que apenas es viable para sufragar el gasto público ya establecido."

Nel ultimu post proponía argumentos pa da-yos a aquellos qu´anecien cola oficialidá por razones políties. Güei fadrelo p´aquellos, qué como faen los de Ciudadanos, dende cuantayá insinuen que la oficialidá y la normalización ye un gastu innecesariu:

2ºMotivos económicos. "¿Con la crisis que hay y gastando dinero en pijadas?"

Nesti puntu nin siquier fadrá falta deci-yos el presupuestu astronómicu que tien el Colectivu Cervantes pol espardimientu del castellanu pel mundu y que con eses perres valdría pa facer campañes pol asturianu durante muncho tiempu. Podríemos fala-yos de los criterios nel repartu de presupuestos pa les comunidaes con llingua autoctona, Feijoó fala de 29 millones d´euros  (http://www.lesnoticies.com/v_portal/informacion/informacionver.asp?cod=3105&te=3&idage=4248&vap=0 )una cifra más qu´apetecible, pero n´Asturies ya hemos d´entamar a planteganos l´autosuficiencia d´una vegada. Falemos-yos de beneficios, de beneficios que podría reportar el nuesu idioma en términos económicos, daqué, como se ve nes sos declaraciones nun solo nun se plantegaron, sinon que simplemente afiten que namai trai gastos... Veamos l´asturianu como una fonte de riqueza más del que saca-y beneficiu económicu. Los asturianos, en feries de turismu pel mundu p´alantre vienden un paisaxe únicu, y una gastronomía´atractiva,... Y hai xente que lo compra. Bien, asumible, vienen foriatos con gana de conocer daque nuevo, atractivo. Lleguen entos perres de fuera, coles que nun contábemos. Agora suma-y a eso un fechu cultural, ye dicir, lo que los estudiosos de los beneficios llamen "Valir añadío". Eso, en llugares de procedencia de bona parte de los turistes que nos visiten, onde nun esisten los prexuicios que tenemos equí al rodiu les cultures minorizaes ye un llamativu perfuerte. Ta comprobao. Un turista nun vien a Asturies dende Alemaña o Suecia a ver un calcu d´Alemaña y Suecia, quieren ver un paisaxe, clima, arquitectura,...llingua y cultures úniques. Tamos falando de xente que marcha con folletos, periódicos, música, tarros de miel cola etiqueta en bretón, n´italianu, en flamencu,...n´asturianu...na llingua llariega del sitiu que visiten como un souvenir, un pequeñu tesoru, anque nun entiendan nada de lo que dicen...¿pero y equí?Eso son perres que vienen de fuera, pero ¿como pue xenerase riqueza n´Asturies al rodiu d´un "productu" con "pocos consumidores potenciales". Bien, llevantemos la vista: equí tenemos un productu únicu, qu´el volume d´esportación ye risible delantre de la producción total, primordialmente podríemos falar que lo que se produz consumese en "casa". Y mueve munches perres, y da puestos de trabayu. Si, la sidre. Alrodiu la sidre muevense agricultores, recolectores, tresportistes, productores, llagareros, chigreros, almacenes,...Un productu únicu, que malapenes sal del Negrón p´allá, pero, que de nun esistir nun esistiríen cientos, miles, de puestos de trabayu directos, por nun falar de los indirectos. ¿Y l´asturianu?Bien, pasa apaecío, un productu solo consumible equí, pero que pue xenerar una industria asemeyada a la sidrera. Nun momentu de plena normalidá, los nenos saldríen de les escueles faciendo-consumiendo música, lliteratura, medios de comunicación, revistes xeneralistes, actividaes, cine,...fecho na nuesa llingua. Pondríen la televisión autonómica. Pa ver Rossane en castellanu o a Chenoa cantando ya pongo Telecinco. Pero na TPA veríen series de dibuxos animaos y pelicules doblaos al asturianu por mozos de la escuela d´Arte interpretativo de la Llaboral, y veríen l´ultimu videoclip d´Alfredo Gonzalez fechu por una empresuca d´imaxe y soníu de rapazos de Candás. Comprarín llibros, revistes,...feches por una editorial que nun esistiría de nun esistir l´asturianu, nin la xente que los imprime, nin los festivales de folk qu´anuncien neses supuestes publicaciones y que mueven a milenta mozos a los pueblos d´asturies pa ver musica del País, pa que depues otros vengan y desmonten los escenarios depues de ser relixosamente pagaos pola Conseyería de Cultura... Nun tamos lloñe d´ello, veanse los datos d´audiencia de los programes fechos n´asturianu y ponganse delantre de los fechos en castellanu. Lo nuevo, viende. Y si tamos en crisis, lo que munches vegaes ayuda ye la vertebración social. Y, anque munchos s´enfoten no contrario un idioma nun separta, sinon xune, y de que manera.

Navegando pela blogesfera asturiana atopo un enllaz d´El Mundo falando del asturianu http://www.elmundo.es/elmundo/2009/06/10/espana/1244661679.html

Digo, bueno, voi echa-y una güeyada a los comentarios, abultabenme bastantes.

Oh! xente repitiendo incansablemente argumentos que munchos vemos desfasaos, simplemente patraña propagandística pero que nun caduquen, tienenlos interiorizaos, grabaos a fuéu, y desgraciadamente la so verdá ye la oficial, a esa xente ye a la que tenemos que convencer NOS, grave....Posé tres comentarios, dexovos que tratéis de saber cualos...

Entamé a escribir el blog y allargame más de la cuenta, fadrelo por capítulos. Pondré, xeneralizando, los principales motivos que dan pa nun almitir la normalización del idioma (económicos, políticos,...), y darréu pondré les propuestes pa baltalos. Convídovos a usalos, los resultaos son debastadores, nos propios comentarios de la noticia asoyelada pol Mundo depués de poner yo un mensaxe la calidá de los siguientes argumentos daos polos llectores fueron camudando, pue ser casualidá, nun lo niego...

1ºFechu nacional, políticu: Hoi oficialidá, mañana independencia.

Bien, cenciello. Entamemos porque soi español, porque llegalmente soilo, tan fartucos d´arrecordamelo. España pegase golpes en pechu de la multiculturalidá que tien, de la convivencia de les distintes identidaes,...Bien, ¿que pintamos los asturianos en too eso?¿Que vos fai pensar que los que defendemos l´asturianu nun queremos a España o que somos nacionalistes?¿Nun podemos aportar la nuesa cultura a la diversidá española d´un mou dignu?Non más qu´otros españoles, gallegos ensin dir más p´alló...¿Nun ye falar asturianu y tocar la gaita la nuesa manera de ser españoles?¿por que vos manca que nun queramos que muerra?¿Nun nos queréis?¿Nun queréis a españa y la so cultura?. ¿Nun ye compatible ser español y querer tener derechos preservaos como asturianofalante?¿O ye que tais insinuando que nun tenemos sitiu nesa multiculturalidá española?¿o tais insinuando qu´esi exerciciu que decis facer d´aceptar les particularidaes ye una mentira?¿Tais diciendonos que tenemos que ser españoles a la vuesa manera?¿Nun podemos ser españoles a la nuesa?¿tais diciendo que "las corridas de toros" ye cultura española pola que merez la pena lluchar y l´asturianu non?¿tais insinuando que nel fondu hai una cultura predominante y depues d´eso ya nun hai más "España"?¿Tais insinuando que nun somos españoles por tener una concencia llingüistica determinada?¿Tais diciendo que´l bable nun ye una llingua española y que tien derechu a siguir aportando durante munchos años a la diversidá esapañola?¿Si nun ye española d´onde ye?¿Marciana?Nun encaxamos, ta visto, nun m´estraña qu´haya xente que quiera más competencies, o que apaezan independentistes...

Probailo, dexareislos n´orsai. Tienen la idea de que los que defendemos la oficialidá andamos a piques de pega-y fueu a les Rojigualdas que vamos topando. Creen que too aquel que ta pola oficialidá ye asturchales. La tortiella da la vuelta. Y ye que cola normalización sal ganando la cultura, non unes sigles politiques. Nun ye cosa de motivaciones polítiques, pero´l contrariu cree que sí, qu´hai una trama detrás. Dicho esto poneis al contrariu a la llingua asturiana por motivación política totalmente KO, nun sabe per onde tirar. Error nel sistema. Nun ye quien a procesar información. Enxamás vos almitirán que la idea d´España que defienden ya ta pesllada, nun almite más pasaxeros, nin otres maneres de ver les coses, nin de debates, nin corrientes de pensamientu, vienden una idea d´España que nin siquiera ellos creen, pero que nun fai falta defendela porque aquel que nun ve clara esa percepción d´España ye un malo mu malo, cuando ye un compatriota suyu quien-y plantea una nueva percepción d´España ponense pates p´arriba.  Ponse nuna encruciyada:

-"Eeeeeh, siiii, buenooooo, vale peroooo...Yá, pero el bable cuesta mucho dinero, gastar millones en esas tonterías me parece un atraso!.

Val manín, nun te preocupes, yá fadré que cambies d´opnión nel prósimu post.

Y agora qué?
Munchos facémonos güei esa entruga. ¿Munchos? Mentira. Y equi ye dende onde tenemos qu´entamar. Nun escenariu más qu´afayadizu, los que caltenemos la cabeza fría lloñe d´autoconvencimientos y onanismos y ganes de echa-y la culpa a otros, vemos que la cosa ponse enforma pindia. Si, afayadizu. Siempre fui de los que camenté que nesti país onde me tocó nacer dase ún de los meyores escenarios pa qu´eche a andar un proyectu de, por, per y p´Asturies. Aquel que caminara un poquiñín decataríase ya va tiempu que la sociedá asturiana ta farta de la clase politica que tien y qué, los qué tienen la fuerza pa dir a les urnes, en munchos casos faenlo coles ñarres cuidadosamente tupíes con pinces yá puestes en casa. Sí, la clase politica nun ye más qu´el reflexu d´una sociedá totalmente paranoica, enquilosada y alloriada. Les coses como son, hai que lo aceptar. Tamos llocos perdíos toos, les coses pol so nome. Pero indiependientemente d´ello dexemos que canten los númberos. La cantidá de votu blancu, de blincos constantes de votos d´unos partíos a otros, l´abstención...Casu únicu en tolos territorios que tuvi oportunidá de pisar. D´otra manera aquellos que caminaren otros territorios decataríense de la nuesa particularidá. La nuestra ye una sociedá tremendamente cohesionada y el sentíu de pertenencia al territoriu que se da n´Asturies ye muncho más grande que en Castiella, Cantabria, Murcia...Sí, como lo oyís, ye lo que creo. Eso sí, tamos cohesionaos a la nuesa manera, a la hora de tiranos trastos a la cabeza ente nós y a lo nuestro, que nun se-y ocurra a daqué foriatu tiranos coses a la cabeza que dexamos d´engarranos y vamos por él xuntos. Y sí, tamién tenemos una visión de la nuestra identidá y territoriu que pocos territorios vecinos tienen (hai hasta encuestes que nun voi enllazar equí que falen d´ello con unos resultaos qu´a munchos dexaría ablucáos)una visión simplayona, folklorista, aldeana, provinciana y a vegaes raspiando lo ridículo, pero fuerte y en munchos otros casos, (nun va ser too autocrítica-flaxelamientu), fuerte, moderna, revisada y adaptada, y lo que ye meyor, aceptada y medrando, les coses clares. Que nun s´enchipe naide, ye una visión particular. Y nun sabemos aprovechalo politicamente. Nun toi insinuando que se faiga politica de pandereta y zapatonos de payaso, nin muncho menos, de fechu creo que ye lo que se fizo hasta agora y foi esti el principal motivu que m´echo p´atrás pa votar una opción nacionalista asturiana en toes les eleciones a les que taba convocáu. Bueno, esi motivu y tamién la incansable necesidá d´arrecordar ca medios díes que se ye nacionalista (sabiendo como saben que nun ye, nin de coña un discursu aceptáu pola mayoría d´asturianos que voten polo que toos sabemos, a otros nun nos presta tampoco esa actitú por razones que pocos conocen, y nun digo que tenga una mala imaxe del nacionalismu por mor de los bombardeos de los medios de comunicación que sufrimos tolos asturianos y non asturianos que tienen una visión demonizada del términu, tengo una mala imaxe del nacionalismu precisamente porque somos victimes d´ello dende´l momentu que´l nacionalismu español nun nos dexa vivir dignamente faciendo usu del nuesu idioma, nun nos acepten derechos individuales porque eso, según paez perxudica y pon en peligru la so visión de la nación, daqué que tien tantes interpretaciones como homes y muyeres. El términu nacionalista ta mal vistu equí, aceptémoslo. Sicasí siguimos enfotaos n´usalu sabiendo que nun cuaya. Intelixencia xente, empecemos por el principio . Si perxudica nun lu uses, pue facese politica igual. Detallucos que nos deprenden los grandes partíos. Nunca nun sintirás palabres de boca de los políticos que rinchen como "Estado de Excepción", y eso nun quier dicir que nun los entamen, reconocelo sería dar pasos al p´atrá. "Nacionalismu" considérase en munchos casos un sentimientu más qu´una ideoloxía, y hai veces que los sentimientos cieguennos dafechu y nun nos dexen ver que tamos delantre del mozu-moza más gafu/gafa del planeta pero tiennos encandilaos-es. Peligroso esto. peligroso ye que dende´l gobiernu valencianu de Camps se-y niegue a un ciudadanu alicantín la posibilidá d´informase o ver o escoyer llibremente la posibilidá de ver una televisión como TV3 pa salvaguardar una concepción d´España afitada arbitrariamente. Talibanismu nacional. Peligroso ye qu´a un talibán con montera picona se-y pase pela cabeza nega-y a un Tapiegu la posibilidá de ver llibremente la TVG porque atenta con una concepción d´Asturies perconcreta. Tan concreta que inda nun llegó a espolletar y nun tien más recorríu que la cabecina abrigada pola montera. Peligroso ye que por esti comentariu daquién dexe de lleer esto, si tovía nun lo fizo yá...Nun ye´l casu que nos toca güei.

Resumiendo y pa finar que pa un día tuvo bien. Apaez un tal UPyD y de sópitu arrampla una cantidá de votos importante, mui per enrriba de la media, apaez un partíu escontra´l maltratu animal y lo mesmo, Democracia nacional, Frente nacional, Los Verdes,....¿Nun atalantáis?¿Soi l´únicu que ve que la xente ta farto, desilusionao?¿Soi l´unicu que ve que la xente quier daqué nuevo ilusonante??¿Soi l´unicu que ve qu´esti baile de votos nun se da n´otru territoriu que nun sea esti?¿Soi l´unicu que ve qu´un asturianu, enantes que verde, antitaurín, procannábicu, socialista, uniónprogresuydemocráticu ye asturianu?¿Tan dificil resultaría vende-y a un asturianu una moto fecha n´Asturies?(si, la verdá ye que dificil enforma)Pero vende-y un proyectu seriu, nuevu, asturianu, de casa, que fale´l mismu idioma qu´ellos, colos mesmos problemes qu´ellos,...¿ye dificil?Yo creo que non, lo que fai falta ye qu´el proyectu sea seriu, nuevu, asturianu, de casa, que fale´l mismu idioma qu´ellos, colos mesmos problemes qu´ellos...y eso, hasta la fecha, nun se dió....