Emburriando palabres

Na última entrada na que falaba de la inminente retresmisión n´Informe Semanal d´un documental sobre les Obres de la Variante de Payares nun me fiaba de la ecuanimidá de la Televisión del réxime al dicir que nel citáu documentau nun tendríen sitiu los afectaos. Nun fueron ecuánimes, ya que dixeron una cosa que ye una mentira que sal del práu de lo gorda que ye, y ye que nesta obra, a la contra de lo que se diz nesti documental, la dignidá y seguridá de los trabayadores estrapállase tolos díes porque lo qu´interesen son les medayes y batir records. Pero equivoqueme nuna cosa, y pido perdón. Salieron parte de los afectaos, póngovos l´enllaz. Dieron-yos voz, como quien cree tar faciendo un enorme favor y esfuerzu. Pamidea foi un llavau de cara y la verdá ye qu´anque caguen pa lo que diz la xente afectao polo menos nun podemos metelos nel mesmu sacu de la derechona cafiante, polo menos nel usu de los medios de comunicación.

 Póngovos equi l´enllaz del citáu documental entituláu "Pajares, montaña vencida". Lo que la xente cree ye que con esta obra lo que se vence ye´l Payares. Yo digo que non, con esta obra lo que se ta venciendo ye al tiempu, a les llexislatures, ganar votos, facer política, caltener a xente trabayando pa que nun enllenen les llistes paraos invirtiendo nuna obra que nun cubre nenguna necesidá rial de la xente llano. Invirtiendo perres públiques pa maquiyar una situación cola que tendremos qu´esfronar dalgún día. Cola rialidá d´un país que ta firmando la sentencia de muerte, vaciando los bolsos pa dar los 4 chapos que-y queden pa comprar globos de colores.

http://www.rtve.es/mediateca/videos/20091128/informe-semanal-pajares-montana-vencida/639082.shtml