Emburriando palabres

Respigueme viendo´l parte. El Cabanyal sálvase, nun podía creelo. 

Depués de tantos años de llucha d´unos vecinos y vecines incansables paez que ye hora de recoyer lo semao. El llabor d´asociaciones de vecinos, culturales...cola plataforma "Salvem El Cabanyal-Canyamelar"  a la cabeza ganaba la batalla a la firmeza autoritaria del Ayuntamientu de Valencia con Rita Barberá al volante. Un frenazu na marcha del PP valencianu y el so curiosu conceptu de "democracia" y "llexitimidá ellectoral". Una marcha con destín al despotismu dafechu. Y ye que´l Ministeriu de Cultura unvía un informe nel que diz que se frene "L`Espoliu al patrimoniu cultural valencianu" que se ta faciendo coles obres d´El Cabanyal.

L´Ayuntamientu de Valencia habría d´aparar darréu les demoliciones de cases y rehabilitar los daños fechos.

Pa quién nun conoza´l barriu nin el casu resúmese cenciellamente. Especulación en crudo, ensin antroxar, ensin escrúpulos. Un barriu, pobláu de pescadores, de xente trabayador, humilde, normal, como tu y como yo...qu´habría de tresformase pa dexar pasu al "porgresu". Al "progresu" plantegáu por un PP valencianu que a ca vuelta d´esquina y fueya arrincada del calendariu amuesa más a les clares que fai política pa señoritos con tarabica, monóculo y sombreru altu, anque pa ello tenga qu´echar lliteralmente a xente de sos cases. Xente en munchos casos vieyo, como ye´l casu d´El cabanyal, xente que pasó la vida trabayando pa mantener una familia, ensin caprichos, y qu´anguañu tienen como frutu d´aquel sudu unes cases que formen ensin duda una rede arquitectónica d´un valir cultural incalculable.

L´Avenida yá esistente de Blasco Ibáñez fadría el so paséu triunfante xuniendo el Centru de la Ciudá cola playa, obviando y frayando too un barriu con una riqueza material ya inmaterial paradóxicamente recoyida nel BIC, na declaración de Bien d´Interés Cultural, declaración que´l propiu Ayuntamientu de Valencia caltuvo.

La degradación intencionada del barriu nun tien otru enfotu que cansar a los vecinos pa que terminen colando y poder revalorizar la zona, espropiaciones a precios ridículos pa disparar los precios de les futures viviendes. Inseguridá, cais puerques, drogues...son les otres batalles coles que tan lluchando los vecinos. Munchos nun colen del barriu porque naide tien derechu a echalos, y notros casos, cenciellamente nun tienen au dir, a diferencia, de les persones pa les que van empobinaes les politiques del PP valencianu, xente con doble residencia según paez...Cases a mediu cayer, deficiencies nos servicios de llimpieza,...Hasta una policía nacional reconociome que nin entraben nel barriu polo "chungu" que yera escaeciéndo polo visto qu´ellos son los encargaos de que los barrios non sean "chungos". Pero nun-yos falta tiempu pa dir pel barriu y acosar en conciertos onde s´axunten mozos del barriu. Conciertos entamaos pol movimientu okupa y asociativu que nun son más que dinamizadores pacíficos de la vida del barriu, y ye que, como digo, si un mozu del Cabanyal quier movese per Valencia de nueche pa espardela tienlo crudo, la comunicación por servicios públicos nun ye la meyor...Y asina ye de "chunga" la realidá de Valencia. Númberos de la Policia Nacional emplegando bona parte´l tiempu en facer llabores de Policia política, asina de duro, asina de claro. Rescampla en barrios con más actividá vecinal y contestaria: Benimaclet, El Cabanyal... dende humildaciones por mor de la llingua (esta paez que ye la más reciente), a supuestes amenaces a redactores d´un mediu d´información por mor d´idioloxía dende ordenadores en dependencies policiales. Menos mal que non tolos policies son iguales, pero fai falta una criba, ta visto. A pesar de les interpretaciones feches polos resultaos electorales la sociedá valenciana discordante ye tremendamente activa, un granu en culo, y eso nun se ve nos medios de comunicación oficiales, los que tuvimos la suerte de vivir ellí y conocer ñeros onde aniciaben idees de resistencia, onde echaben a andar proyectos ilusionantes, o cenciellamente se reflesionaba dende un puntu críticu les polítiques cuspíes dende la Generalitat nun nos queda otra cosa que sintir envidia sana d´ello. Iniciatives como "Ja n´hi ha prou", "Adeu PP", "Acció Popular contra la Impunitat"...o la reciente "En Moviment", amás de la multitudinaria manifestación que´enllenó apocayá les cais de València escontra la corrupción, coles otres tantes a favor de les emisiones de TV3 nel País Valencianu, o escontra la política d´educación de la Generalitat, ye una amuesa. De la imaxe que tienen ellí de l´Asturies rebelde y contestataria queda ná mas que´l recuerdu y dende equí nun nos queda otro que mirar y deprender de los que moyen el culo pa piescar daqué. Y nel País Valencianu defender delles idees politiques llexítimes de manera pacífica, pública y democráticamente a vegaes supón un viaxe abegosu

El respigu tornó n´ascu. La Generalitat Valencia echa alantre una decisión (por decretu-llei) na que permite espresamente la continuación de los derribos y de la obra vergoñosa, mexando pel informe asoleyáu apocayá, lo que pal gobiernu valencianu ye una intromisión y un atentáu del gobiernu de Zapatero. En metanes la población más desamparao pero non menos persistente. Y según paez la llucha vecinal pola normalidá, por poder vivir nun barriu en "pau y en peu" (en paz y en pie) tien pinta de siguir, amosando la otra cara d´un País Valencianu que nun tamos avezaos a ver. De mano tan llamaos a conceyu

"Cabanyal, herida abierta"-Documental sobre la llucha vecinal del barriu

http://www.kaosenlared.net/noticia/documental-completo-cabanyal-herida-abierta

"Arrels de lluita" (Raigaños de llucha)-Documental en valencianu asoleyáu por Maulets, recordando la llucha vecinal en defensa del territoriu y escontra la especulación xabaz na ciudá de Valencia, especialmente interesante la llucha de les vecines de La Punta (tien 6 partes más, más que recomendable)