Emburriando palabres

Un rapazu de Xixón peganos un puñetazu a toos, un avisu a toos aquellos que nun terminen d´aceptar la decadencia na que ta metíu el ser humanu a escala global. Y ye que Alberto Arce métese na boca´l llobu pa grabar y cuspinos unes imaxenes que desgraciadamente nunca saldríen pelos mass media durante la operación nomada "plombu fundío" que consistió nel bombardéu indiscrimináu a población civil en Gaza. Trátase de To shoot an elephant , internacionalmente aplaudida, nun de los formatos más impactantes y de "moda", en primer persona, viviendo al traviés de los güeyos del cámara el drama d´un pueblu avezáu a la muerte y que glaya la necesidá de que la comunidá internacional s´entere.

Proyéctase durante esta selmana en delles ciudaes del planeta, n´Asturies ya hebo delles proyeiciones, pero esti vienres 22 de xineru encamiéntovos a allegavos al Local Cambalache  a les 20:00 pa velo. Si nun podeis dir nun pasa nada, ta a llibre difusión na páxina web del documental http://www.toshootanelephant.com/.

 L´asemeya cola que s´entama esta entrada ye del tamién asturianu Javier Bauluz, cola que ganó´l Pullitzer de periodismu nel añu 1995. Una obra bramente bayurosa la d´esti home que percorrió Chiapas, Ruanda, Bosnia, Sah.ara...cola so máquina pa captar la otra cara del planeta.

Alberto Arce y Javier Bauluz dan-y más sentíu que naide a la espresión "Una imaxe val más que milenta palabres" nun sistema nel que los medios de comunicación, mayoritaria y penosamente, ca vez que faen usu de la palabra nun ye pa informar sinon pa ser partícipes de la noticia empobinándola al gustu d´ellos.

Desgraciadamente estos dos asturianos pue ser que nun tengan el reconocimientu que merecen, que sean poco conocíos onde nacieron, onde ta llantada, paradóxicamente, una de les factoríes que más armamentu apurre al exercitu israelín.

 A ellos dos, esti blog de güei.